कृष्ण कुमार अजनबी
देवभोग गरियाबंद (छ ग)
मोबाइल 9691194953
कुलदीप सिन्हा "दीप"
कुकरेल ( सलोनी ) धमतरी
अमिता रवि दुबे
पोरा हमर तिहार हे, भरगे रस अब धान मा।
उछाह के आधार हे, भादों महिना ज्ञान मा।।
पूजा बइला के हरे, आथे घर -घर नाँदिया।
रोटी -पीठा ठेठरी, गठरी बाँधव मूठिया।।
खन - खन घंटी बाँध दे, दउड़त हावय शान मा।
पोरा हमर तिहार हे, भरगे रस अब धान मा।।
समझन संस्कृति सार हे, बात ग्यान के रोट हे।
हो थे गर्भाधान हे, दाना भरथे पोट हे।।
खेती काम महान के, प्रतीक पुरुष महान मा।,
पोरा हमर तिहार हे, भरगे रस अब धान मा।।
लोढ़ा जाता सील मा,रंधना गुधना पीसना ।
नोनी मन के काम ला, कहिथें खेलत सीखना।।
अक्ती- भक्ति हे शक्ति के,जग भोले गुनगान मा।
पोरा हमर तिहार हे, भरथे रस अब धान मा।।
जतका रीति रिवाज हे, आपन गाँव समाज के।
मानत जुन्ना मन सबो,नवा नेवरिया आज के।।
धरती दाई देत हे,धन - दौलत खलिहान मा।।
पोरा हमर तिहार हे, भरथे रस अब धान मा।।
कुलदीप सिन्हा "दीप"
दू अउ दू हा होथे चार।
पेलथस काबर मुड़ के भार।
चुप रेहे ले तोर कुछु नइ बिगड़े,
गली गली झन पार गोहार।
ज्यादा अतलंग जेन हा लेथे,
उही मन बोहाथे धारे धार।
भाई भाई के झगरा मा भइया,
परिया पर गे हे खेतिखार।
जेन हा भुंजथे छानी मा होरा,
जर जाथे वोखर घर-बार।
जेब ला टमर के खर्चा करबे,
कखरो कर झन हाथ पसार।
घर सबो के जे करथे अंजोर,
वोखरे तरी हा होथे अँधियार।
चतुरा ला केकरा नइ चाबे,
कोनो नइ पावे वोखर पार।
झूठ लबारी के पौबारा हे,
ईमान बेचागे बीच बाजार।
अउ आगू का होही "दीप"
हे सारी दुनिया करत विचार।
**********
कुकरेल ( सलोनी ) धमतरी
कवि प्रभात
निटोर देहे निच्चट बादर, अब का पानी गिरही ग?
दूरगत होही जतने धान के, सपना जम्मो मरही ग
खातू माटी के करजा बाड़ही,
काकर माथे उबरबो
साँसो के मारे का जीबो,
का हम चैन के मरबो
बड़ सुग्घर इ जिनगी हमर, फांदा जी के बनही ग
दूरगत..
खाय कमाय जाये बर लागहि,
छोड़ के घर, बारी ल
छोड़ के घाट, घटऊँधा सुन्दर
दई, लइका, नारी ल
उन्हों दुख रंग रंग के पाबो, जिनगी हम ल तरही ग
दूरगत..
बिहा नोनी के नई होवे,
बाबू कईसे पड़ही
घर के भिथिया दिखे भसकउल,
चम्मासे मं ओदरही
बिना दवई के डोकरी दाई, बेमारी में घिलरही ग
दूरगत..
लागा बनिया के नई चुके,
ब्याज लगाहि नावा
करिहा किलौली त नरियाही
"त मोर पईसा लावा"
आही घेरी बेरी तगादा, इज्जत माटी मिलहि ग
दूरगत..
नहर के पानी जे खेत आही,
लुही ओहा सोना
ओकर मतलब के हो जाहि,
पेलत जांगर रोना
देख के ओकर छलकत कोठी, मोर मन आगी बरही ग
दूरगत..
ग्राम-कटगी (छत्तीसगढ़
कुलदीप सिन्हा "दीप"
नारी हे तब नर हे जग मा,
नर हे तब तो नारी जी।
दोनों हावे गा एक बरोबर
करो न कखरो चारी जी।।ध्रुव पद।।
जग गाये हे नारी के महिमा,
नर के गा कब गाही जी।
इहाँ एक दूसर के बिना दोनों,
पहिचान कहाँ ले पाही जी।
का होही गा दुनिया मा जब,
सब रहि जाही ब्रम्हचारी जी।।1।।
जम्मो नारायण होये हे पैदा,
नारी के गा तन ले जी।
फेर बिन नर के कइसे होही,
वो पैदा नारी मन ले जी।
तब काबर कहिथे दुनिया हा,
नारी ले देवता हारी जी।।2।।
सती सावित्री अनुसुइया जइसे,
अउ होये हे कतको नारी जी।
फेर इंखरे मन ले मिले हवे गा,
नारी मन ला चिन्हारी जी।
उही समय ले होये हे जग मा,
नारी के महिमा उजयारी जी।।3।।
नर नारी दोनों मिल के संगी,
सृजन सृष्टि के गा करे हे।
तब ले ज्यादा नारी के किस्सा,
सद्ग्रंथ मन मा जी भरे हे।
एखरे सेती सोंचत हे नर मन "दीप"
इहाँ कब आही हमरो बारी जी।।4।।
कुकरेल ( सलोनी )
नरेन्द्र नन्द
नियत रहे साफ अउ सच्चा
गोठ लागही करेजा अच्छा
चेहरा म नहीं मन ले देखही
उजियार बन अंधियार नही
नियत हर जब परेम ले भरे
बईर नही कोनो हर तब घरे
जोन चाही त बुराई हरही
ओकर रद्दा म कांटा नीरही
नियत ले करम ह निखरथे
बिन बोले असर ह उभरते
जेकर करेजा हे नेक इरादा
मनोकामना जल्दी मिलथे
नियत म होय उजियारा
वोला न डर न कोई सहारा
सच के डोर थमके चलथे
वो हर सबले ऊंच सितारा।
जान्हवी सदन
अम्बेडकर वार्ड
धमतरी,छत्तीसगढ़
84588 06946