दारू सराब झनिच पिबे

     जगतसिंह ठाकुर 'बंजारीवाले'

दारू सराब झनिच पिबे तैं , दारू म हानि भारी ।
घर कुरिया सब बेंचा जाथे , लोटा  बटकी  थारी ।।१।।
आनी  बानी  रोग   समावै , धर   खाथे  बीमारी ।
डॉक्टर बैगा ठगहीं रुपिया , पुजबे कुकरी कारी ।।२।।
छोड़य नहीं तब ल बीमारी , नोहय गोठ  लबारी ।
पानी कस रुपिया  बोहावै , बृथा  कमाई  सारी ।।३।।
कतको  कमाबे   पूरै  नहीं , बढ़  जाथे  लाचारी ।
भूखन  मरथें   नोनी  बाबू , अंग  संग   के  नारी ।।४।।
कपड़ा लत्ता बर सब तरसैं , परय  सुने  बर गारी ।
कतको परिवार  टूट जाथे , जाथे   भाग  सुवारी ।।५।।
नारी बिन नर  तन हे सुन्ना , अँगना महल अटारी ।
दारू  घर   हे  बरबादी  के , सुन   लेवा  सँगवारी ।।६।।
छोड़व  साथी  दारू  पीना , देखौ मन म बिचारी ।
जिनगी सँवरे 'ठाकुर' बोले , कहना  धरव  हमारी ।।७।।
                    जगतसिंह ठाकुर 'बंजारीवाले'
सम्पर्क सूत्र--   बरिष्ठ साहित्यकार }
ग्राम बंजारी  पो.जेवरा ( हरदी )
जि.सारंगढ़-बिलाईगढ़ ( छग )  पिनकोड ४९६४५०

६२६६५२४२६१,९४०६०५७७६३