घूस

दूजराम साहू 'अनन्य '

धंधा भ्रष्टाचार के, होगे हे आसान ।
माल मिले चोखा बने , होय खूब सम्मान ।।1।।

अफ़सर नेता मन मिले , बाबू देवय साथ ।
गड्डी मोटा देख के , पुलिस मिलावय हाथ  ।।2।।

माल तोल के लेत हे , बिना तराजू तोल ।
रिश्वत के बाजार मा ,बिकत हवय बिन मोल ।। 3।।
नइ खावय जे घूस ला , करय न भ्रष्टाचार।
अइसन सिधवा जीव हा , पीड़ा सहे हजार ।।4।।

मानय बने तिहार वो, लेथे जेहर घूस ।
सत के रद्दा जे चले,करजा लेवय ठूस ।।5।।

हूम - धूप हर  नेंगहा , भाव -भक्ति हे सार ।
करजा कर जोंगा करय ,माने तभे तिहार ।।6।।

भीख मंँगइया के घलो, होथे बड़ सम्मान ।
बाना सत के जे धरे, वो होवत हिनमान ।। 7।।

बाढ़त भ्रष्टाचार हे ,जिम्मा लेही कौन ।
अफ़सर आंँखी मूंँद लिन ,नेता मन हे मौन‌।। 8।।
    

निवास- भरदाकला (खैरागढ़)