गांधी फेर आजा ...

• नन्दकुमार साहू

बाढ़त हे भारत म दिनों दिन, भारी अतियार
गांधी फेर आजा एक बार
        अहिंसा सत के बल म, अँगरेज ल तैंह भगाए ।
        आतंकवादी ऊहँचे, रोज कतको खून बहाए ।।
जनता के इहाँ हाल बेहाल हे, मस्त हवे सरकार
गांधी फेर आजा एक बार
        ओकरे सिंग बाढ़े हे, जेन हावे लबरा लफंगा ।
        पूरा देस दहलगे हे, जघा - जघा होवत हे दंगा ।।
नइ हे गरीब के आँसू पोछैया, रोवत हे बोमफार
गांधी फेर आजा एक बार
        दफतर करमचारी, आफिस के अधिकारी ।
        नेता अउ बय पारी, सब हे भ्रष्‍टाचारी ।।
देस ल ठाढ़े - ठाढ़ लिलत हे, भय , भूख, भ्रष्‍टाचार
गांधी फेर आजा एक बार
        बिन आँखी, कान, मुँहू के, तोर तीनों बेंदरा का बताही ।
        नियाले म घलो बिकथे, वकील, जज, अउ गवाही ।।
संसद म अब देस बिकत हे, लेही कोनो लेनदार
गांधी फेर आजा एक बार
        का सोंचे रेहे तैंह, अऊ फेर का होवत हे ।
        पाके सुराज उलटा, मुड़ धरके रोवत हे ।।
राम राज के सपना सँजोए, होगे वहू खुवार
गांधी फेर आजा एक बार

• ग्राम - धामनसरा (मोखला)पोष्‍ट - सुरगी, जिला -राजनांदगांव (छ.ग.),
•  मोबाइल - 9329 - 95482