गढ़ के गढ़हईया

• ध्रुव कुमार वैष्णव

छत्तीसगढ़िहा गढ़ के गढ़हईया, सऊहत बिसकरमा जान रे ।
लहू - पछिना के धार बोहइया, भागीरथी जेखर नाव रे ।।
पथरा ह देख के पथरा जथे, नदिया - नरवा ह ठड़िया जथे,
डोंगरी - डिलवा पहाड़ ह कपथे, पांव - पांव म समुंद ह नपथे ।
कहिथे पाया ह कारखाना के , इहि ह हमर सियान रे ।।

दांदर भर जांगर ह च लथे, कारी - पछिना गिरत ले लड़थे,
झड़ी - जाड़ अऊ घाम म बाहिर, गिरा के लहू कहानी लिखथे ।
दूंद ऊघरा अउ बिरबिट करिया, भिलई के लोहा जान रे ।।

रापा, गैती,तूतारी धरके, करमा, ददरिया के पाठ पढ़थे,
जांगर के संग नागर च लथे, भुइयां ह सोन के दाना उगलथे ।
धान कटोरा के चिन्हारी करईया, सऊहत अनदाता जान रे ।।

नरवा - नदिया के धार उतरथे, समुंद म आके कालेचुप,
जांगर के तर - तर धार चढ़थे, उत्ती, बुढ़ती, भंडार रखसऊ ।
गांव के जोगी ल जोगड़ा कहिथे, परदेश म जोग जगात रे ।।

दया - मया बर पाग ए गुड़ के, गोठ बर गुरतुर खेड़हा ए ,
नता - गोता म गोलइन्दा भाटा, सहिनाव, मितान अऊ ढ़ेड़हा ए ।
दही - मही अऊ पताल कस फदका, लरा - जरा म फदके जान रे ।।

पर बर जिइस, पर बर मरिस, गरूवा अस जिनगानी,
जिते - जिय त जिनगी रहिस दोनगा, फूंक दिस बड़हर बर जवानी ।
घर - कुरिया ह मडू हावे, महल ल छुआ दिस अगास रे ।।

• ममता नगर, राजनांदगांव (छ.ग.)मोबाइल - 93296 - 92671