गँहू संग मा घुन पिस जाथे

पर के धन मा ऐश करे के, जोखा जेन लगाथे ।

गँहू संग वो घुन के जइसे, संगे-संग पिसाथे ।।

नेता मन के पाछू धर के, चमचा मन अँटियाथेे ।
अपन विरोधी बैरी ऊपर, भारी धौंस जमाथे ।।

नेता के किरपा पाए बर, कुत्ता भी बन जाथे ।
जेकर ऊपर छुछुवा देथे, तेकर बर गुर्राथे ।।

अपन सुवारथ साधे खातिर, नेता ढोंग रचाथे ।
नेता गड़बड़ करनी करथे, चमचा मारे जाथे ।।

घर-परिवार सुखी राखे बर, सब चौकस हो जावौ ।
गँहू सँग मा घुन के जइसे, झन अब खुदे पिसावौ ।।

रचयिता- मोहन लाल कौशिक, बिलासपुर (छ.ग.)