सावन आगे

सावन के महीना
पानी गिरय झोर-झोर...
छानी परवा चूँहय
चिखला माते खोर-खोर...2

पुरवाही चलत  हे, सरर- सरर
बियासी के बइला, तरर- मरर
            काँसरा धरे होर- होर........

नंदिया-नरवा अघावन लागय
धरती के कोरा..भावन लागय
       हरियर रुखवा चारों ओर.....

हाँका पारत हे,खेतिहारिन मन
ददरिया झड़के,बनिहारिन मन
          निंदत हवय कोरे- कोर....

गदगद लागय,जम्मों खेती-खार
आरी-बारी झूमय,देख तुमा नार
         हरेली के कर जोरा- जोर....

अनदाता  के, दुख- पीरा  हरागे
पाछु  बछर  के....घावे  सूखागे
         बने बरसबे बिनती हे मोर....

सावन के महीना
पानी गिरय झोर-झोर.....
छानी परवा चूँहय
चिखला माते खोर-खोर.....!

          -- राजकुमार 'मसखरे'
                   14-07-2022
मु.-भदेरा-पैलीमेटा,जि.-KCG (cg)