सुहावत हे, सुहावत हे !

सुहावत हे सुहावत हे सुहावत हे
किसानी के दिन बादर,एक मन के आगर
चारो मुड़ा हाँसी खुशी छावत हे .........2

बरखा रानी के रुन- झुन
भंवरा ह करय भुन- भून
बिजली ह नाचै छम-छम
बादर ह गरजय घम-घम
इंकर अंसड़हूं बानी भावत हे.......! सुहावत...

भिंदोल ह  करय टर- टर
पूरवाही चलय  सर- सर
झिंगरा के देखव वो रंगत
गहिरीन कीरा के ये पंगत
डहर डहर माटी ममहावत हे.....! सुहावत...

नांगर  बइला अरर -तरर
धान के बांवत छर- छरर
लकर धकर आना जाना
बिधुन हो के गावय गाना
खेत म ददरिया धमकावत हे .....! सुहावत...

सुहावत हे सुहावत हे सुहावत हे
किसानी के दिन बादर,एक मन के आगर
चारो मुड़ा हाँसी खुशी छावत हे .........2

                       -- राजकुमार मसखरे