भुइँया के लगिन.....

डॉ. जीवन यदु
भुइँया के लगिन सरग संग धरागे,
मड़वा सहीं बखरी - बारी होगे रे ।
करिया बादर,
होगे आगर,
घटा कारी हो गे रे ।
    भुँइया के तन - मन दूनों सितरगें ।
    चातर अउ डोंगर दूनों हरियागें ।
    बादर रितोवय कभू बरपेली ।
    भुइँया के मन मं जगावय हरेली ।
    घुडुर - घाड़र करथे बादर बइहा ह,
    बाजा - रूँजी के तियारी होगे रे ।
भुइँया करत हे सवाँग सवाँगे ।
रखिया - तरोई - तुमानार टाँगे ।
हरियर लुगा फूल के छप्पा वाला ।
ओरमाही काली करेला के माला ।
पाना नवा, फूल नवलख सवाँगा ।
सोन - चाँदी घलो लबारी होगे रे ।
    नाँगर ल धरके निकलगे नँगरिहा ।
    बइला लागे घलो खरतरिहा ।
    ठउँका सवाँगा इही मन करैया ।
    एमन हें भुइँया के , इखरे हे भुइँया ।
    जाँगर अउ नागर बदिन हे मितानी,
    बादर घलो संगवारी होगे रे ।
मनखे के हिरदे होगे सुआ पाँखी ।
झूलय मयारू ह आँखिच आँखी ।
हिरदे मं बीजा रहिस हे मया के ।
पीका कस फू टिस उही उम्हियाके ।
ननपन मं नान्हें रिहिस हे मया ह,
कउखन जल्दी मोटियारी होगे रे ।
गीतिका
दाउचौरा, खैरागढ़, जिला - राजनांदगांव6छ.ग.8