डॉ. मदन देवांगन
चंदन हे मोर देस के माटी, पावन मोर गांव हे ।
बाजय जिंहा धरम के घंटी, तेखर छत्तीसगढ़ नाव हे ।।
होत बिहिनिया खेत जाये, नागर घर के नगरिहा ।
भूमर - भूमर बनिहारिन गावैं, करमा सुआ ददरिया ।
परत जिंहा हे सुरूज देव के, चकमिक पहिली पांव हे ।।
राम असन मर्यादा वाले, कृष्णा करम कबीर हे ।
गांधी सुभास आजाद भगतसिंग, आजादी के रनधीर हे ।
गंगा जमुना के निरमल पानी में, ममता मया के छांव हे ।।
अनधन - गियान गीत उपजइया, माटी कोयला पथरा ।
साधु संत तपसी के धरती, सुख शांति अंचरा ।
प्रेम सांति भाईचारा, हमर इही भाव हे ।।
चंदन हे मोर देस के माटी, पावन मोर गांव हे ।
बाजय जिंहा धरम के घंटी, तेखर छत्तीसगढ नाव हे ।।
पता : राजा परपोड़ी, दुर्ग (छ .ग.)
साभार : गुरतुर गोठ
कोई टिप्पणी नहीं:
एक टिप्पणी भेजें