- मुकुन्द कौशल -
सबो कती पिरथी मा बगरे, हरियर - हरियर रंग रे।
पानी के बरसे ले जागिस, मन मा गजब उमंग रे।।
खनन् - खनन् - खन् चूरी बाजै
बोलै मन के बात
सरर - सरर अँचरा उड़ि जावै
पुरवा के लहरात
घेरी - बेरी केंस बगर के करथे मोला तंग रे।
पानी के बरसे ले जागिस मन मा गजब उमंग रे।।
एक्के दारी देख के कइसन
जादू कस कर डारिस
आँखी के ढेंकी मा जिउ ला
चाँउर कस छर डारिस
ये अलकरहा पीरा पा के, टूटै जम्मो अंग रे।
पानी के बरसे ले जागिस, मन मा गजब उमंग रे।।
सोवत - जागत उन्कर सपना
देखत रहिथे आँखी
उनला पा के हमरो जिउरा
होगै सूवा पाँखी
मन करथे पानी मा फींजौ, पतरेंगा के संग रे।
पानी के बरसे ले जागिस, मन मा गजब उमंग रे।।
सबो कती पिरथी मा बगरे, हरियर - हरियर रंग रे।
पानी के बरसे ले जागिस, मन मा गजब उमंग रे।।
खनन् - खनन् - खन् चूरी बाजै
बोलै मन के बात
सरर - सरर अँचरा उड़ि जावै
पुरवा के लहरात
घेरी - बेरी केंस बगर के करथे मोला तंग रे।
पानी के बरसे ले जागिस मन मा गजब उमंग रे।।
एक्के दारी देख के कइसन
जादू कस कर डारिस
आँखी के ढेंकी मा जिउ ला
चाँउर कस छर डारिस
ये अलकरहा पीरा पा के, टूटै जम्मो अंग रे।
पानी के बरसे ले जागिस, मन मा गजब उमंग रे।।
सोवत - जागत उन्कर सपना
देखत रहिथे आँखी
उनला पा के हमरो जिउरा
होगै सूवा पाँखी
मन करथे पानी मा फींजौ, पतरेंगा के संग रे।
पानी के बरसे ले जागिस, मन मा गजब उमंग रे।।
- पता - एम - 516, पद्नाभपुर, दुर्ग छ.ग. - 491001
कोई टिप्पणी नहीं:
एक टिप्पणी भेजें