राम कहाँ आदर्श रह गया

राम-राम जी कहिथन लेकिन,
बात  राम के  हम  नइ  मानी ।
सिख  हिन्दू   मुस्लिम  ईसाई,
जैन बौद्ध सब सम नइ जानी ।।1।।

भेदभाव अंतस घट भीतर,
महुरा  जइसे  भरे  पड़े  हे ।
हिन्दू-हिन्दू ल  हम बाँटेन,
पर धर्मी  मुस्कात  खड़े हे ।।2।।

शूद्र जाति अउ छुआछूत ला,
नेता   शासन   हवा   देत  हे ।
निज शासित मा मुँह सी लेथे,
पर  शासित  के  सोर  लेत हे ।।3।।

धूर  विरोधी   नेता  गण के,
हाल अलग नइ परै दिखाई ।
अपन-अपन रोटी सेंकत हे,
सोंचव  कइसे  देस  बँचाई  ।।4।।

मर्यादा   पुरुषोत्तम   रघुवर,  
जेकर  हिन्दू जन  गुन  गाथे ।
बिरले अनुयायी के  कथनी,
अउ करनी हर सम हो पाथे ।।5।।

संत-महंतन   सत्ता   पाके,
मानवता  ला  बिसराए  हे ।
दुश्मन जेन जनाइस वोला,
धुर्रा   अविलंब   बनाए  हे ।।6।।

राम राज मा सुखी रहिन सब,
दुनिया वाले  मन  कहिथे जी ।
लेकिन अंतस  राम भक्त  के,
अब रावण बसके रहिथे जी ।।7।।

राम भक्त बन कहत फिरत हे,
जो   है  नहीं   मेरे   राम   का ।
हमर संग  नइ  देवय  जे  मन,
वोकर जीवन किस काम का ।।8।।

अंधभक्त मन के मारे अब,
मोर  राम  होत  बदनाम हे ।
संसो मा  दिन-रात  पहाथे,
सदा समय होत बलवान हे ।।9।।

जानबूझ के जहर पियत हन,
अइसनहे सब झन मर जाबो ।
काली नाग नथइया बन फिर,
मोहन आही  तव  बच  पाबो ।।10।।

रचयिता- मोहन लाल कौशिक, बिलासपुर (छ.ग.)