बने दिन

टीका देशमुख

 

राजा ह उछाह म गरजिस,
बने दिन अवइय्या हे।
मंत्री मन मुचमुचइस,
बने दिन अवइय्या हे।
अधिकारी मन गदकिन,
बने दिन अवइय्या हे।
करमचारी मन छटपटइन,
बने दिन अवइय्या हे।

जनता ह जोशियाईस,
बने दिन अवइय्या हे।
शहेर -नंगर ह चिचियाइस,
बने दिन अवइय्या हे।

गोठ ह गाँव के मंगलू कर पँहुचिस,
बने दिन अवइय्या हे।
मंगलू,बुजरुग चैतू ल सोरियाईस,
बने दिन अवइय्या हे।

सियान ह सुनिस, गुनिस अऊ बरजिस,
सबे दिन बने हे ग।
बने दिन आये नही,लाने जथे।
परछी म ओरमे,धंधाय पिंजरा ले
मिट्ठू ह, किररईस
बने दिन अवइय्या हे।

 

तेंदुभाठा (बकरकट्टा)
जिला - राजनांदगाँव