जीवन यदु
धरती रानी करे हवय, का निरजला उपास।
पूछे बर चउमास ला, भेजे हवय अगास।
पहली बूँद अगास ले, जे दिन गिरिस मितान।
छींचत हे तइसे लगिस, बादर बिजहा धान।
बादर पहली बेर जब, गरजिस जग - झगझोर
कोतवाल पारत हवय, हाँका जइसे खोर।
खुडुवा कस खेलय कभू, दउड़े पल्ला - मार।
पढ़वैया लइका सहीं, बादर के ब्योहार।
बिजुरी चमके रात मा, झक ले लगे अंजोर।
कोंटा में अंधियार तब, सपटे जइसे चोर।
चाहे घर - परछी चुहय, रेला धर ले धार।
तभो बरस बादर बबा, पानी प्रान - अधार।
बाँवत बर पानी गिरय, बाँवत माते खेत।
जेवन धर खटला खड़े, खाये के नइ चेत।
बड़ दानी बादर बबा, मन - भर देवय दान।
तरिया - नदिया दान मा, होवत हें भगवान।
सतरंगिया कमठा धरे, इन्दर खड़े अगास।
धरती बोलय- '' छोड़ सब, झटकुन खेत अपास ''
गीतिका
दाउचौंरा, खैरागढ़
जिला - राजनांदगांव ( छत्तीसगढ़ )
कोई टिप्पणी नहीं:
एक टिप्पणी भेजें