हो गे हे बिहान ..

डां. जीवन यदु
हो गे  हे बिहान, उठ मितान जाग रे ।
तोर हे बंधे सुरुज के संग भाग रे ।


बेर - बेर बेर हार गे गोहार के ।
बेर झन अबेर कर तयँ बेर ढार के ।
चल उठा गुलाल खोर के बहार के ।
भाग ल जगा - जगा रे घर दुवार के ।
बेर - बेर तयँ ये बेर झन तियाग रे ।
तोर हे बँधे सुरूज के संग भाग रे ।


हाँत - बात ल बेहाँत झन करो, मितान ।
ये बिहान ल तो रात झन करो, मितान ।
ढेर ढेरिहा के बात झन करो, मितान ।
घाम कुनकुना हे, तात झन करो, मितान ।
झन लगा मनुख के नाँव मं तय दाग रे ।
तोर हे बँधे सुरूज के संग भाग रे ।


ये समे, समे हा तोर मुँह निहारथे ।
मोर संग चल ग - कहिकें, वो गोहारथे ।
जेन ह समे के गोठ ल बिसारथे ।
तेन ल समे ह फँून के निमारथे ।
गा समे के राग मं समे के फाग रे ।
तोर ह बँधे सुरूज के संग भाग रे ।
गीतिका
दाऊ चौरा, खैरागढ़
जिला - राजनांदगांव ( छ.ग.)