उहाँ - इहाँ

• हरप्रसाद निडर

सबे सहर अब गंगा होगे,
मोर गंवाई नंगा होगे।
घूसखोर उहाँ डूबकी मारैं
इहाँ रोटी बर दंगा होगे॥
कमइया जांगर ल देखा,
भुंजाये कस पापड़।
दू बर ल दू आषाढ़ फेर,
मंहगाई के झापड़।
उहाँ मरूरहा बैपारी अऊ,
सुकटा मुंशी दबंगा होगे।
इहां बीमारी भूखमर्री म,
कोठी हर भर भंगा होगे॥
साहूकार के सूदखोरी म
लोटा बटकी बूड़गे।
गहना धनहा भैसा गाड़ा,
करम दया के फूटगे।
उहाँ के चार बेच के
मंजिल रंग बिरंगा होगे।
इहाँ धान दुबराज खेत के
मंडी म करंगा होगे॥
हाड़ी - हाड़ी म राजनीति
भरगे दूहना म पानी।
तैंतीस कोटि देवी देव संग
चढ़गे खपरा छानी।
उहाँ कनवा थानेदार,
भैरा अधिकारी चंगा होगे
इहाँ बने बर कोटवार,
जाति धरम म पंगा होगे॥

• गटटानी, कन्या शाला के सामने, अकलतरा रोड, जांजगीर (छग.)