श्रम गीत : जिंहा जांगर

• डाँ. पीसी लाल यादव

जिहाँ जांगर, तिहाँ जिनगी, अऊ उहें उजियार हे,
जिहॉ परन हे, जिहॉ लगन हे, उहें अमरित धार हे।

    बाँहा के भरोसा म भईया,
    पानी ओगरथे पथरा म।
    मन म हे सक्ति - साधन त
    सोन उपजथे कँकरा म॥
जिहाँ बाँहा, जिहाँ बल हे, उहें खुसी के संसार हे।
जिहॉ जांगर ...............................................।

    साधन के का रोना - धोना,
    साधन हे तोर हाथ म।
    बजूर कस बांहा - छाती
    जांगर हवय साथ म॥
जिहाँ सुम्मत तिहाँ सम्पत्ति, उहें सरग के दुवार हे।
जिहाँ जांगर ...............................................।

    करनी कुछ अइसे करले
    के मुच - मुच हाँसे जिनगी ह।
    गढ़ अइसन पैडगरी जेमा
    रेंगय तोर साथी संगी ह॥
जिहाँ संगी जिहाँ साथी, उहें जिनगी तिहार हे।
जिहाँ जांगर ...........................................।

• गण्डई - पंडरिया, जिला - राजनांदगांव ( छग.) मो. 9424113122