- देवनारायण निषाद
आषाढ़ सावन के महिना मा, बदलगे हमर पहनावा
जेन महिना घनघोर पानी गिरे, ओ महिना ठनठन ले सुखागे
घाम आगी कस मुड़ म परिस ते, चुंदी चि किन सिरागे
कइसन बछर आगे संगी, कइसन बछर आगे ।
किसानी के हहा तता, खुमरी झिल्ली हा सिरागे
अंगरा कस दहकत घाम म, माथा घलो पिरागे
बटकी भर बासी, अउ मार सिलपट्टा के चटनी
दहकत गोरसी के आगी, अंगेठा असन हा नंदागे
कइसन बछर आगे संगी, कइसन बछर आगे ।
रगरग ले घाम करथे, लगथे बरसा ही सिरागे
फेर बिहिनिया देखले, गली चौरा चिखला मा सड़बड़ागे
बिहनिया के झगरा अऊ संझा के पानी किस्सा घलो नंदागे
गरजना ऐसे लागथे, जैसे छानी छप्पर उप्पर मा उड़ागे
कइसन बछर आगे संगी, कइसन बछर आगे ।
तीजा - पोरा के ठेठरी, खुरमी ल, ठठरंग ठठरंग चाबन
कमरा ओढ़न जाड़ म, हूहू हूहू आगी ला तापन
महतारी लइका ला लोरी सुनात कथे, ददा चरबज्जी खेत जाही
चार ले पांच बजगे, अऊ कुकरा घलो बासे ला भूलागे
कइसन बछर आगे संगी, कइसन बछर आगे ।
ग्राम व पोष्ट - गिरौद, वि. ख. - मगरलोड, तह. - कुरूद, जिला - धमतरी (छ.ग.)
कोई टिप्पणी नहीं:
एक टिप्पणी भेजें