दिन सँउर जाही

- आत्माराम कोशा '' अमात्य '' -

ककरो चेहरा ल नजर भर के देख ले
खुसी तँउर जाही तोर दिन सँउर जाही।

सँइत कोई बपुरी हा उंचकपारी हो
दुख बिसर जाही तोर दिन सँउर जाही।

जिनगी म दुखे - दुख हे, प्रेम के भूखे - भूख हे
कतका लुकाही ? तोर दिन सँउर जाही।

नजर म झन बिकार रहे, सतधरमी बिचार रहे
राहय न अऊ कुछु काँही ,तोर दिन सँउर जाही।

दुनिया के अड़बड़ ताना हे, नजरों ह गजब सियाना हे
कतको तोला भरमाही, तोर दिन सँउर जाही।

दुनिया के भाव ल देख झन, गलती ल कभू सरेख झन
आत्मा ल ठंडक पहुँचाही, तोर दिन सँउर जाही।

ककरो चेहरा ल नजर भर के देख ले
खुसी तँउर जाही, तोर दिन सँउर जाही।

• पुराना गंज चौक, राजनांदगांव  (छ.ग.) मो. 81036- 60394