दिया बार दव

    

• डां. विमल कुमार पाठक

 दिया बारदव ।
   अंधियारी के कचरा ल
      सफ्फा बहार दव ॥
        दिया बारदव ॥
   बारो महिना बर उजियारी
      ल तियार दव ॥
       दिया बार दव
अब किसान के शोषनकर्ता,अउ व्यापारी ।
मिठलबरा सब चोर,दलालन, भ्रष्‍ट्राचारी ॥
      के आंखी अउ नाक - कान ल
      बने झारदव ।
        दिया बारदव ॥
खेत - खार मं सोन सहीं,जब धान उपजिही ।
गहूं, चना, कुशियार, तिली,ले डोली सजिही ॥
      अनपुन्ना के पूजा कर
      आरती उतार दव ॥
        दिया बारदव ॥
बायो - डीजल, फल अउ फूल, अउ सब्जी - भाजी ।
 उपजावव भरपूर, रहय, सब घर भर राजी ॥
      साक्षर जम्मों बनव, जनम
      सब झन सुधार लव ।
        दिया बारलव ॥
बढ़िया उपजय फसल,किसानी पोट्ठ होय जी ।
 झन तो परय अकाल, न कोन्नो गांव रोय जी ॥
      बिमल होय शुभ - लाभ
      जमों ला वो तिहार दव ।
        दिया बारदव ॥

खुर्सीपार जोन - 1 मार्केट,
आई.टी. आई के पीछे,
सेक्टर -11, भिलाई ( छ.ग.)